На 2 март 2026 година, на Економскиот факултет во Скопје, Бирото за јавни набавки одржа еднодневна интерактивна работилница за претставници од Државниот завод за ревизија на тема „Јавни набавки – дилеми и предизвици“.
Работилницата беше организирана на барање на Државниот завод за ревизија, во рамки на континуираната соработка меѓу двете институции, со цел размена на знаења, искуства и практични аспекти од примената на системот на јавни набавки.
Настанот беше отворен со воведни обраќања на директорката на Бирото за јавни набавки, д-р Маре Богева Мицовска, и главниот државен ревизор м-р Максим Ацевски, кои ја истакнаа важноста од континуирана едукација, правилна примена на законската регулатива и унапредување на транспарентноста и отчетноста во системот на јавни набавки.
Во рамки на работилницата беа опфатени повеќе актуелни теми поврзани со примената на Законот за јавните набавки, меѓу кои:
- исклучоците од примена на Законот за јавните набавки;
- посебните начини за склучување на постапките, вклучително и секторски договори и рамковни спогодби;
- склучување и изменување на договорите за јавни набавки и користење средства за обезбедување;
- новини во Електронскиот систем за јавни набавки (ЕСЈН), вклучително и е-пазарот, користењето на „црвени знаменца“ и е-архивирањето;
- начини на вршење административна проверка и утврдената состојба во пракса.
Предавачи на работилницата од страна на Бирото за јавни набавки беа:
- Маре Богева Мицовска
- Рита Глигориевска
- Катерина Поповска
- Горан Давидовски
- Валентина Ефтимова
Работилницата се одвиваше во интерактивна атмосфера, со активна дискусија и размена на искуства меѓу претставниците на двете институции. Учесниците имаа можност да дискутираат за практичните дилеми со кои се соочуваат во примената на законската регулатива и да разменат мислења за можни решенија и унапредување на практиките.
Настанот заврши со заклучни согледувања, при што беше нагласена потребата од понатамошно јакнење на институционалната соработка и континуирано градење на капацитетите, со цел обезбедување ефикасен, транспарентен и одговорен систем на јавни набавки.
