Бирото за јавни набавки успешно реализираше две од предвидените четири онлајн обуки за измените на Законот за јавни набавки и новата надградена верзија на ЕСЈН. Обуките беа организирани со цел да ги информираат економските оператори (ЕО) и договорните органи (ДО) за новите законски одредби и подобрените функционалности на системот ЕСЈН.
На 10 и 11 март 2025 година, првите две обуки беа спроведени преку платформата Microsoft Teams, каде учесниците имаа можност да се запознаат со новите правила и олеснувањата во процесите на поднесување понуди и објавување на огласи.
Клучни теми на обуките:
Што содржат измените на ЗЈН?
- Доуредување на одредби поврзани со изјавата за способност, со цел поголема правна сигурност при учество во постапките за јавни набавки.
- Воведување на административна проверка наместо управна контрола, што значи поефикасна и транспарентна проверка на тендерската документација.
- Недоставување на задолжителни документи во рамки на поедноставена отворена постапка ќе резултира со негативна референца за економските оператори.
- Можност за раскинување на договори согласно член 88 поради неквалитетно извршување, со цел зголемување на одговорноста на економските оператори.
Нови функционалности и алатки во ЕСЈН:
- Автоматска тендерска документација – со внесување на податоците, системот автоматски ја генерира и објавува тендерската документација.
- Финансискиот образец на понудата ќе биде интегриран во ЕСЈН, што значи дека економските оператори ќе ги внесуваат цените и количините директно во системот.
- Подобрена транспарентност при измената на огласите и тендерската документација.
- Автоматско потпишување на документите на ниво на систем, со што се олеснува процесот за сите корисници.
- Намалување на можноста за аритметички грешки во финансиските понуди, што ќе придонесе за поголема правна сигурност и точност на податоците.
Следните две обуки ќе се одржат на 17 и 18 март 2025 година. Сите пријави се затворени поради пополнување на максималниот број на учесници. Линк за учество на обуката ќе биде испратен до пријавените кандидати на 14.03.2025 година.
Биро за јавни набавки продолжува со напорите за подобрување на јавните набавки преку дигитализација и воведување на транспарентни и ефикасни процеси. Ви благодариме за вашето учество и интерес!
