Më 17 dhe 18 mars 2026, Zyra e Prokurimeve Publike, me mbështetje ekspertësh nga Delegacioni i Bashkimit Evropian, organizoi dy punëtori të dedikuara prezantimit të draftit të Udhëzuesit Praktik për zbatimin e kriterit Oferta Ekonomikisht Më e Favorshme (OEMF). Ngjarjet u zhvilluan në ambientet e Ministrisë së Financave dhe ishin të destinuara për përfaqësuesit e autoriteteve kontraktuese, me qëllim përmirësimin e zbatimit praktik të kriterit OEMF në prokurimet publike.
Punëtoria e 17 marsit u hap nga Drejtoresha e Drejtorisë së Prokurimeve Publike, dr. Mare Bogeva Micovska, e cila prezantoi kontekstin dhe rëndësinë e hartimit të Udhëzuesit, duke theksuar nevojën për vlerësim të unifikuar dhe objektiv përmes kritereve të qarta. Më 18 mars, ngjarjen e hapi Këshilltari Shtetëror, mr. Aleksandar Argirovski, i cili nënvizoi rëndësinë e kriterit OEMF në sigurimin e shërbimeve publike cilësore dhe efikase, si dhe nevojën për balancimin e çmimit dhe cilësisë gjatë përzgjedhjes së ofertës.
Në kuadër të të dyja ngjarjeve, eksperti i angazhuar nga Bashkimi Evropian përmes WeGlobal, z. Haris Piknjac, prezantoi draftin e Udhëzuesit Praktik dhe metodologjinë e propozuar për zbatimin e OEMF. Prezantimi përfshiu:
- formulimin e kritereve dhe nënkritereve për vlerësim,
- sistemet e pikëzimit dhe mekanizmat për reduktimin e subjektivitetit,
- gabimet më të shpeshta që shfaqen në dokumentacionin e tenderit,
- shembuj nga punimet ndërtimore dhe procedurat për furnizimin me ushqime për shkolla, me theks në vlerësimin e cilësisë (standardet ushqyese, siguria, logjistika etj.).
Pjesëmarrësit diskutuan aktivisht për sfidat praktike dhe ndanë përvoja nga puna e tyre. U theksua nevoja për:
- indikatorë të qartë dhe të matshëm,
- metodologji të përmirësuar dhe të standardizuar,
- përcaktim të duhur të vlerave peshore,
- shembuj shtesë praktikë,
- zhvillimin e modeleve dhe mjeteve të unifikuara që do të reduktojnë subjektivitetin në pikëzim.
Materialet, përfshirë draft‑udhëzuesin dhe metodologjinë, iu dorëzuan paraprakisht pjesëmarrësve, gjë që mundësoi diskutim më efikas dhe propozime më konstruktive. Të gjitha komentet dhe rekomandimet e marra gjatë punëtorive do të merren parasysh në finalizimin e Udhëzuesit Praktik.
Punëtoritë përfunduan me mirëkuptim të përbashkët se Udhëzuesi Praktik për zbatimin e OEMF duhet të përfaqësojë një mjet të qartë, praktik dhe të unifikuar, i cili do të kontribuojë për:
- cilësi dhe efikasitet më të lartë në prokurimet publike,
- transparencë dhe besim të shtuar në sistem,
- reduktim të subjektivitetit në vlerësim,
- menaxhim më të mirë të burimeve publike.
Drejtoria e Prokurimeve Publike do të vazhdojë me aktivitete për mbështetjen e institucioneve në zbatimin e kriterit OEMF dhe përmirësimin e standardeve në sistemin e prokurimeve publike.
